অনুভৱ

#মুখত হাঁহি বিৰিঙোৱা কিছুমান স্মৃতি!!

# আঘোন মাহত পথাৰত ধান কটাৰ পাছত নৰাৰ ওপৰত দৌৰা-দৌৰি কৰি অথবা কাবাডী-গুডু খেলি গধুলি হাত-ভৰি ধুবৰ সময়ত কাটি চিৰলা-চিৰিল দিয়া ভৰিত পানী লাগোতে হোৱা চেকচেকনিখিনি!

# দোৰোণ শাকৰ বগা কণমানি ফুলটো লাহেকৈ চিঙি গুড়িৰ ফালে লাহেকৈ চুপি দি পোৱা মিঠা সোৱাদটো! সেইকামটো জবাফুলতো কৰিছিলোঁ।

# বৰদৈচিলাই সৰাই থৈ যোৱা আমকলি খাই ওঁঠৰ চাৰিওফালে ঘাঁ লগা!

# দোকান দোকান খেলি চন্দন গুটি বেছোতে কোনোবা এজনীয়ে মোক পাঁচ পইছা দিবলৈয়ে থাকিল।

# ফাগুণ মাহৰ পচোৱা বতাহত উৰি ফুৰা শিমলু তুলা ধৰিবলৈ জঁপিয়াই জঁপিয়াই পিছে পিছে দৌৰা!

# কেইবাদিনো পেনপেনীয়া বৰষুণত আমনি লাগি তিনিডাল বাঢ়নী কাঠীত ৰঙা জলকীয়া খুচি চোতালত কাঠীকেইডাল খুচি থোৱা

# বৰষুণত পিছলি পৰিলে কাৰোবাক সহানুভুতি দেখোৱাতকৈ "ওপৰলৈ চা" বুলি চিঞৰা!

# ৰঙালাওৰ বাকলি ছাগলীকেইজনীক খুৱাই সিহঁতৰ গালতে কাণখন লগাই চোবোৱা শব্দটো শুনা!

# কাউৰীমণি বা শেৱালিফুলেৰে বনগুটিৰ ঠাৰিডালত সীউৱা মালাডাল!

# বেছি বৰষুণ দিলে পদূলিৰ বাটচৰাৰ দুয়োফালে থকা পুখুৰীদুটাৰ মাজত খান্দি দিয়া লুইটোৰে বৈ যোৱা পানীখিনিত ডৰিকণা মাছ চোৱা...

# সোনকালে স্কুল গৈ (এল পি) কিতাপ থৈ স্কুলৰ পিছফালৰ পথাৰত মিঠা মিঠা চেঁচু বিচৰা!

......কিমান যে স্মৃতি। :)